Um skólann
Brimver
Túngötu 39 v. Vinatorg | 820 Eyrarbakka
480 6352
strandheimar@arborg.is
Æskukot
Blómsturvöllum 1 | 825 Stokkseyri
480 6352
strandheimar@arborg.is
Leikskólastjóri: Birna Guðrún Jónsdóttir | birnagj@arborg.is
Aðstoðarleikskólastjóri: Eva Björk Friðjónsdóttir | evabf@arborg.is
Leikskólinn Strandheimar starfar á tveimur starfsstöðvum, Brimveri á Eyrarbakka og Æskukoti á Stokkseyri. Leikskólinn er fjögurra deilda og eru eldri og yngri deild á hvorri starfsstöð.
Leiðarljós Strandheima eru vellíðan, sköpun og virðing. Þau endurspegla það sem við viljum að einkenni samfélagið okkar og samskipti barna og fullorðinna. Við leggjum áherslu á að skapa hlýlegt, öruggt og hvetjandi námsumhverfi þar sem hvert barn fær að njóta sín og þroskast á eigin forsendum.
Vellíðan
Við viljum að börnum líði vel, finni fyrir öryggi og upplifi að þau tilheyri samfélaginu. Hlýja, nærvera og góð tengsl eru grunnur að námi, leik og þroska.
Sköpun
Við gefum hugmyndum, forvitni og frumkvæði barna rými. Í leik og fjölbreyttri reynslu fá börn tækifæri til að rannsaka, prófa, skapa og finna eigin leiðir.
Virðing
Við mætum hvert öðru af virðingu og leggjum áherslu á að hlusta á sjónarmið barna. Við berum virðingu fyrir ólíkum þörfum, styrkleikum og leiðum til að læra og vera þátttakandi í samfélaginu.
Hlutverk kennarans
Hlutverk kennarans er að vera til staðar fyrir börnin af nærveru, áhuga og virðingu. Kennarinn fylgist með, hlustar og styður við leik, samskipti og nám barnanna. Hann skapar aðstæður sem hvetja til forvitni, þátttöku og sköpunar og gefur börnunum svigrúm til að hafa áhrif á eigið nám og leik.
Leikurinn er hjartað í starfinu okkar. Í leik rannsaka börn heiminn, skapa, eiga samskipti, takast á við viðfangsefni og byggja upp þekkingu og færni. Við leggjum áherslu á að efla leikinn í daglegu starfi og skapa börnunum í auknum mæli tíma, rými og fjölbreytt tækifæri til leiks. Jafnframt vinnum við að því að efla hlutverk starfsfólks í að styðja við leik og nám barnanna af nærveru og virðingu.
Starf Strandheima byggir á Aðalnámskrá leikskóla, menntastefnu og læsisstefnu Árborgar. Strandheimar eru jafnframt Heilsueflandi leikskóli og starfa í anda Jákvæðs aga.
Saga leikskólans
Leikskólarnir Brimver á Eyrarbakka (1975) og Æskukot á Stokkseyri (1983) voru sameinaðir í einn leikskóla, Heilsuleikskólann Brimver/Æskukot, árið 2011. Leikskólinn starfaði eftir Heilsustefnu Unnar Stefánsdóttur allt til haustsins 2022 og bar titilinn Heilsuleikskóli fram að því.
Vorið 2022 var gerð nafnabreyting á leikskólanum og ber hann nú eitt nafn í stað tveggja. Nafnið Strandheimar vísar til strandlengjunnar sem tengir þorpin saman og vísar endingin –heimar til fleiri leikskóla í Árborg, en þar eru nú starfræktir fjórir leikskólar sem enda á –heimar; Álfheimar, Goðheimar, Hulduheimar og Jötunheimar.