Laugardaginn 22. október sl. hélt Barnaskólinn á Eyrarbakka og Stokkseyri upp á 170 ára afmæli skólans.
Afmælishátíðin var vel sótt og var dagskrá hennar einstaklega vel heppnuð.
Nemendur Strandheima voru með söngatriði á hátíðinni þar sem þau sungu tvö lög af mikilli innlifun og við mikinn fögnuð viðstaddra.
Lögin sem börnin sungu voru Umhverfis- og heilsusáttmáli Strandheima og Vinur minn, en bæði lögin eru með fallegan boðskap sem skilaði sér svo sannarlega í gegnum kröftugan söng barnanna. Áður en börnin hófu söng sinn hélt Tinna, aðstoðarleikskólastjóri, stutt ávarp fyrir hönd Strandheima:
Kæru gestir,
Innilega til hamingju með þennan merka dag í sögu Barnaskólans á Eyrarbakka og Stokkseyri.
Við í leikskólanum Strandheimum finnum ávallt fyrir hlýju og velvild í okkar garð þegar Barnaskólinn á í hlut og erum við afskaplega stolt og þakklát fyrir það góða samstarf sem skapast hefur á milli skólastiganna undanfarin ár.
Þorpin, Eyrarbakki og Stokkseyri, bjóða upp á mörg tækifæri þegar kemur að menningu, náttúru og umhverfi og eru það mikil forréttindi að hér fái nemendur, hvort sem er í leik- eða grunnskóla, að njóta skólagöngu undir góðum verndarvæng lærdómssamfélagsins sem hér er starfandi.
Megi það halda áfram að vaxa og dafna um ókomna tíð.
Það verður ýmislegt í boði þessa vikuna á vegum Barnaskólans og má þar m.a. nefna íþróttaþrautabraut á Stað nk. miðvikudag kl.12:35-13:55.
Þar verður elstu nemendum Strandheima boðið að taka þátt og munu nemendur okkar í Æskukoti ferðast, ásamt kennurum sínum, með skólabíl Barnaskólans fram og til baka.
Hægt er að sjá viðburðadagskrá Barnaskólans í tilefni afmælisins inni á heimasíðu þeirra: Barnaskólinn á Eyrarbakka og Stokkseyri (barnaskolinn.is)
