Um skólann

Leikskólinn Strandheimar er starfræktur á tveimur starfsstöðum, Brimveri á Eyrarbakka og Æskukoti á Stokkseyri. Leikskólinn er fjögurra deilda og eru eldri og yngri deild á sitthvorri starfsstöðinni.

Leikskólinn starfar eftir Aðalnámskrá leikskóla og lögum um leikskóla, Menntastefnu Árborgar auk þess að vera Heilsueflandi leikskóli og starfa í anda uppeldisstefnu Jákvæðs aga.

Saga leikskólans

Leikskólarnir Brimver á Eyrarbakka (1975) og Æskukot á Stokkseyri (1983) voru sameinaðir í einn leikskóla, Heilsuleikskólann Brimver/Æskukot, árið 2011. Leikskólinn starfaði eftir Heilsustefnu Unnar Stefánsdóttur allt til haustsins 2022 og bar titilinn Heilsuleikskóli fram að því.

Vorið 2022 var gerð nafnabreyting á leikskólanum og ber hann nú eitt nafn í stað tveggja. Nafnið Strandheimar vísar til strandlengjunnar sem tengir þorpin saman og vísar endingin –heimar til fleiri leikskóla í Árborg, en þar eru nú starfræktir fjórir leikskólar sem enda á –heimar; Álfheimar, Goðheimar, Hulduheimar og Jötunheimar.