Síðustu ár höfum við í Strandheimum verið með verkefni í gangi hjá elstu nemendum leikskólans. Verkefnið köllum við Vinátta í nærumhverfinu. Felst það í að elstu börn leikskólans hittast einu sinni í mánuði, til skiptis á Brimveri á Eyrarbakka og Æskukoti á Stokkseyri og verja þar deginum saman við leik og störf. 

Nú þegar hafa börnin hist tvisvar sinnum, í Æskukoti þann 17. september og Brimveri  29. október.

Fastir liðir eru á hvorum stað fyrir sig. Á Eyrarbakka tengjum við saman yngstu og elstu ábúendur staðarins með því að heimsækja Sólvelli og syngja fyrir fólkið þar. Á Stokkseyri er samstarf við BES sem hluti af brú milli leik og grunnskóla, þar taka börnin þátt í skólatíma, nesti, frímínútum og tónmennt.

Á báðum stöðum er nærumhverfið kannað með gönguferðum um umhverfið og heimsóknum í hinar ýmsu stofnanir.

Vinátta er meginþemað og er aðalmarkmið þessa verkefnis að byggja upp tengingar og vináttu á milli barnanna sem eru í sama árgangi og styrkja þau í núinu og til framtíðar.

Foreldrasamstarf er mjög mikilvægur þáttur í verkefninu og þökkum við foreldrum kærlega fyrir frábært samstarf, án ykkar aðkomu væri okkur ekki kleift að halda verkefninu gangandi. Samstarfið felst í því að foreldrar mæta með börnin á þá starfsstöð sem við á hvert sinn. Í vetur er þó sú breyting á að börnin fá tækifæri til að æfa sig í að fara með skólabíl þegar þau mæta á Stokkseyri og er það frábær þjálfun fyrir næsta vetur þegar þau fara í 1. bekk í BES.

Frekari upplýsingar um verkefnið er að finna á heimasíðu Strandheima: Þróunarverkefni – Leikskólinn Strandheimar